ഐഎസ്ഒ അംഗീകാരം നേടി മോട്ടോർ തൊഴിലാളി ക്ഷേമനിധി ഓഫീസ്

തൃശ്ശൂർ : കേരള മോട്ടോർ തൊഴിലാളി ക്ഷേമനിധി ബോർഡിന്റെ ചീഫ് ഓഫീസ് ഐഎസ്ഒ 9001:2015 അംഗീകാരം കരസ്ഥമാക്കി. ജർമനി ആസ്ഥാനമായി പ്രവർത്തിക്കുന്ന യൂനിസെർട് എന്ന കൺസൾട്ടൻ സി യുടെ ഇന്ത്യൻ ചാപ്റ്റർ മുഖേനയാണ് ബോർഡിന് ഐ എസ് ഒ അംഗീകാരം ലഭ്യമാക്കിയത്. കൂടുതൽ മികച്ച സേവനം കാഴ്ചവെക്കുന്നതിനും വിവിധ ആനുകൂല്യങ്ങൾ സമയബന്ധിതമായി നൽകുന്നതിനും ഐ എസ് ഒ അംഗീകാരം ഉപകരിക്കും. ക്ഷേമനിധി തൊഴിലാളികൾക്കായി നൂതനമായ സൗകര്യങ്ങളാണ് വകുപ്പ് ഒരുക്കിയിട്ടുള്ളത്.

അംഗങ്ങൾക്ക് ക്ഷേമനിധി വിഹിതം അടക്കുന്നതിനായി www.kmtwwfb.org എന്ന വെബ്സൈറ്റിൽ കയറി സൗത്ത് ഇന്ത്യൻ ബാങ്ക്, ആക്‌സിസ് ബാങ്ക് എന്നീ ബാങ്കുകളുടെ പേയ്മെന്റ് ഗേറ്റ് വേ യിലൂടെ അംശദായം അടക്കാം. അക്ഷയ / ഫ്രണ്ടസ് ജനസേവന കേന്ദ്രങ്ങൾ എന്നിവ വഴിയും ഇ -ഡിസ്ട്രിക്ട്, പബ്ലിക് പോർട്ടൽ വഴിയും സൗജന്യമായി ക്ഷേമനിധി അംശദായം അടക്കാം. ഇ പേയ്മെന്റിലൂടെ സൗത്തിന്ത്യൻ ബാങ്ക്, ആക്‌സിസ് ബാങ്ക് എന്നിവയുടെ ശാഖകളിൽ വാഹന നമ്പർ നൽകിയാൽ അംശദായമടക്കാനുള്ള സേവനം എല്ലാ വാഹന ഉടമകൾക്കും ലഭ്യമാക്കിയിട്ടുണ്ട്. കൂടുതൽ ബാങ്കുകളെ ഉള്‌പെടുത്തുന്നതിനുള്ള നടപടികൾ പുരോഗമിച്ചു കൊണ്ടിരിക്കുകയാണ്. ഓഫീസുകളിൽ സൈ്വപ്പിംഗ് മെഷീൻ സേവനം ലഭ്യമാക്കിട്ടിട്ടുണ്ട്. ബോർഡിൽ രജിസ്റ്റർ ചെയ്തിട്ടുള്ള എല്ലാ തൊഴിലാളികൾക്കും ഉടമകൾക്കും ക്ഷേമനിധിയി വിഹിതമറിയുന്നതിനായി മൊബൈൽ അപ്ലിക്കേഷനും ബോർഡ് തയ്യാറാക്കിയിട്ടുണ്ട്.

ക്ഷേമനിധി വിഹിതം അടക്കാതെ വാണിജ്യ ആവശ്യത്തിനായി ഉപയോഗിക്കുന്ന വാഹനങ്ങൾ നികുതി അടക്കുന്നത് തടയാൻ പരിവഹൻ ഇന്റഗ്രേഷൻ സോഫ്റ്റ്വെയറും ബോർഡ് സ്വീകരിച്ചിട്ടുണ്ട്. 2019 ഒക്ടോബറിലെ ഉത്തരവ് പ്രകാരം ക്ഷേമനിധി തൊഴിലാളികളുടെ വിവിധ ആനുകൂല്യങ്ങളുടെ തുക ഇരട്ടിയായാണ് വർദ്ധിപ്പിച്ചിട്ടുള്ളത്. 2018-19 ഇൽ 14775 ഗുണഭോക്താക്കൾക്കായി 22.95 കോടി രൂപയാണ് വിവിധ ആനുകൂല്യ ഇനത്തിൽ ബോർഡിൽ നിന്ന് വിതരണം ചെയ്തിട്ടുള്ളത്. സുതാര്യവും കുറ്റമറ്റതുമായ സേവനം കാഴ്ചവെക്കുന്നത്തിനുള്ള അംഗീകാരമാണ് വകുപ്പ് ഓഫീസിനു ലഭിച്ച ഐ എസ് ഒ പുരസ്‌ക്കാരം.