430 ഡോക്ടർമാർ ഉൾപ്പെടെ 480 ജീവനക്കാരെ ആരോഗ്യവകുപ്പ് പിരിച്ചു വിടുന്നു

പ്രൊബേഷൻ പൂർത്തിയാക്കിയ 53 ഡോക്ടർമാരും പ്രൊബേഷനർമാരായ 377 ഡോക്ടർമാരും കൂടാതെ, ആറ് ഹെൽത്ത് ഇൻസ്പെക്ടർമാർ, നാല് ഫാർമസിസ്റ്റുകൾ, ഒരു ഫൈലേറിയ ഇൻസ്പെക്ടർ, 20 സ്റ്റാഫ് നഴ്സുമാർ, ഒരു നഴ്സിംഗ് അസിസ്റ്റന്റ്, മൂന്ന് ദന്തൽ ഹൈനീജിസ്റ്റുമാർ, രണ്ട് ലാബ് ടെക്നീഷ്യൻമാർ, മൂന്ന് റേഡിയോഗ്രാഫർമാർ, രണ്ട് ഒപ്റ്റോമെട്രിസ്റ്റ്, രണ്ട് ആശുപത്രി അറ്റൻഡർ, മൂന്ന് റെക്കോഡ് ലൈബ്രേറിയൻമാർ, ഒരു പി.എച്ച്.എൻ. ട്യൂട്ടർമാർ, മൂന്ന് ക്ലാർക്കുമാർ എന്നിങ്ങനെ 50 ജീവനക്കാരുമുൾപ്പെടെ 480 ജീവനക്കാരെയാണ് അനധികൃത അവധി എടുത്തതിന് നടപടിക്രമങ്ങൾ പാലിച്ചുകൊണ്ട് ആരോഗ്യവകുപ്പ് പിരിച്ചുവിടുന്നത്.

അനധികൃതമായി ദീർഘനാൾ സർവീസിൽ നിന്നും വിട്ടുനിൽക്കുന്നത് ആരോഗ്യ വകുപ്പിന്റെ പ്രവർത്തനത്തെ താറുമാറാക്കുകയും ജനങ്ങൾക്ക് അർഹമായ സേവനം ലഭ്യമാക്കുന്നതിന് തടസമാവുകയും ചെയ്തു. ഇത്തരം ജീവനക്കാരെ സർവീസിൽ തുടരാനനുവദിക്കുന്നത് അർഹരായ ഉദ്യോഗാർത്ഥികൾക്ക് അവസരം നഷ്ടപ്പെടുത്തുന്നതിന് ഇടയാക്കുകയും ചെയ്യും. അതിനാലാണ് കർശന നടപടി സ്വീകരിക്കുന്നതെന്ന് ആരോഗ്യ മന്ത്രി കെ കെ ശൈലജ വ്യക്തമാക്കി.