കൊറോണ: ചൈനയിലെ വിമാനത്താവളത്തില്‍ പെട്ടുപോയ മലയാളി വിദ്യാര്‍ത്ഥികള്‍ ഇന്ന് ഇന്ത്യയിലെത്തും
ബെയ്‌ജിങ്‌ : ബെയ്ജിങ്ങിലെ കുമിങ് വിമാനത്താവളത്തില്‍ കുടുങ്ങികിടക്കുന്ന മലയാളി മെഡിക്കൽ വിദ്യാര്‍ത്ഥികള്‍ ഇന്ന് ഇന്ത്യയിലെത്തും.15 പെൺകുട്ടികൾ അടങ്ങുന്ന ഡാലിയാൻ യൂണിവേഴ്സിറ്റിയിലെ വിദ്യാർത്ഥികളുടെ സംഘമാണ് രാത്രി 11 മണിക്ക് നെടുമ്പാശേരി വിമാനത്താവളത്തിലെത്തുക. തായ് എയര്‍ലൈന്‍സിലൂടെ ബാങ്കോക്ക് വഴിയുള്ള വിമാനത്തിലാവും ഇവരെ നാട്ടിലെത്തിക്കുക.
കൊറോണ ബാധ ഗുരുതരമായി വന്ന പശ്ചാത്തലത്തിൽ സിംഗപ്പൂർ വഴി ഇന്ത്യയിലേക്ക് മടങ്ങാൻ തീരുമാനിച്ച വിദ്യാർത്ഥികൾ ഫെബ്രുവരി 3 ന് വിമാനത്താവളത്തിലെത്തിയപ്പോഴാണ് സിങ്കപ്പൂർ പൗരൻമാരെ അല്ലാതെ ആരെയും സിങ്കപ്പൂരിലേക്ക് പോകാൻ അനുവദിക്കില്ലെന്ന് അധികൃതർ വ്യക്തമാക്കിയത്. വിദേശ രാജ്യങ്ങളെല്ലാം കൊറോണയുടെ പശ്ചാത്തലത്തിൽ ചൈനയിൽ നിന്നുള്ളവർക്ക് വിലക്ക് ഏർപ്പെടുത്തിയിരുന്നു. ഇതാണ് വിദ്യാർത്ഥികൾക്കും വിനയായത്. തുടർന്ന് വിമാനത്താവളത്തിൽ കുടുങ്ങിയ വിദ്യാർത്ഥികൾ വാട്സ്ആപ്പ് വഴി ബന്ധുക്കളെ കാര്യം അറിയിച്ചതോടെയാണ് വിദ്യാർഥികളുടെ അവസ്ഥ പുറത്തറിയുന്നതും വിദ്യാർത്ഥികളെ നാട്ടിലെത്തിക്കാനുള്ള നടപടികൾ തുടങ്ങിയതും.
