Top Stories
സംസ്ഥാനത്ത് ഇന്ന് 11 പേർക്കു കൂടി കൊറോണ
തിരുവനന്തപുരം : സംസ്ഥാനത്ത് ഇന്ന് 11 പേർക്കു കൂടി കൊറോണ സ്ഥിരീകരിച്ചു. കാസർകോട് ജില്ലയിൽ 6 പേർക്കും കൊല്ലം, ആലപ്പുഴ, എറണാകുളം, പാലക്കാട്, കണ്ണൂർ ജില്ലകളിൽ നിന്നുള്ള ഓരോരുത്തർക്കുമാണ് രോഗം സ്ഥിരികരിച്ചതെന്ന് ആരോഗ്യ വകുപ്പ് മന്ത്രി കെ.കെ. ശൈലജ അറിയിച്ചു.
ഇതോടെ കേരളത്തിൽ ആകെ കോവിഡ് സ്ഥിതീകരിച്ചവരുടെ എണ്ണം 306 ആയി. ഇതിൽ 50 പേർ രോഗമുക്തി നേടി ഡിസ്ചാർജായി. ഇന്ന് കേരളത്തിൽ എട്ടുപേരുടെ പരിശോധനാഫലം നെഗറ്റീവ് ആയിട്ടുണ്ട്. കണ്ണൂർ ജില്ലയിൽ നിന്നും ഏഴു പേരുടെയും തിരുവനന്തപുരം ജില്ലയിലെ ഒരാളുടെയും പരിശോധനാഫലമാണ് നെഗറ്റീവ് ആയത്. നിലവിൽ 254 പേർ വിവിധ ആശുപത്രികളിൽ ചികിത്സയിലാണ്.
ഇന്ന് രോഗം സ്ഥിരീകരിച്ച അഞ്ചുപേർ ദുബായിൽനിന്നും വന്നവരാണ്. ഇതിൽ കാസർഗോഡ് നിന്ന് 3 പേരും , കണ്ണൂർ നിന്നും എറണാകുളത്തുനിന്നും ഓരോരുത്തരും ഉണ്ട്. ആലപ്പുഴ, കൊല്ലം, കാസർകോട് എന്നീ ജില്ലകളിലെ രോഗം സ്ഥിരീകരിച്ച മൂന്നുപേർ നിസാമുദ്ദീനിൽ പോയി വന്നവരാണ്. പാലക്കാട് രോഗം സ്ഥിരീകരിച്ചയാൾ നാഗ്പുറിൽനിന്നു വന്നയാളാണ്. കാസർകോട് സ്വദേശികളായ രണ്ടുപേർക്ക് സമ്പർക്കത്തിലൂടെയാണ് രോഗം വന്നത്.
സംസ്ഥാനത്തെ വിവിധ ജില്ലകളിലായി 1,71,355 പേർ നിരീക്ഷണത്തിലാണ്. ഇവരിൽ 1,70,621 പേർ വീടുകളിലും 734 പേർ ആശുപത്രികളിലും നിരീക്ഷണത്തിലാണ്. ഇന്ന് 174 പേരെയാണ് പുതുതായി ആശുപത്രിയിൽ പ്രവേശിപ്പിച്ചത്. രോഗലക്ഷണങ്ങൾ ഉള്ള 9744 വ്യക്തികളുടെ സാമ്പിൾ പരിശോധനയ്ക്ക് അയച്ചിട്ടുണ്ട്. ഇതിൽ ലഭ്യമായ 8586 സാമ്പിളുകളുടെ പരിശോധനാ ഫലം നെഗറ്റീവ് ആണ്.
