കൊറോണ ജാഗ്രത: സർക്കാർ ഉത്തരവിന് പുല്ലുവില നൽകി സിഐടിയു

സ്ത്രീകളും കുട്ടികളും വൃദ്ധരുമടക്കമുള്ളവർ യോഗത്തിൽ പങ്കെടുക്കുന്നുണ്ട്. യോഗത്തെക്കുറിച്ച് സിഐടിയുവിന് അകത്തുള്ളവർക്ക് തന്നെ എതിർപ്പുണ്ടെന്നാണ് സൂചന. ഇന്നലെത്തന്നെ സിഐടിയു ജില്ലാ സെക്രട്ടറിയോട് കൗൺസിൽ യോഗം മാറ്റി വയ്ക്കണമെന്ന് ആവശ്യപ്പെട്ടിരുന്നതാണ്. എന്നാൽ ഇത് അംഗീകരിക്കാൻ ജില്ലാ നേതൃത്വം തയ്യാറായില്ല.

ജില്ലാ കളക്ടർ സിഐടിയു ജില്ലാ നേതൃത്വത്തെ വിളിച്ച് ഇത്രയധികം പേർ പങ്കെടുക്കുന്ന യോഗമായതിനാൽ അടിയന്തരമായി ഇത് നിർത്തി വയ്ക്കാൻ നിർദേശിച്ചു. എന്നാൽ മണിക്കൂറുകൾക്ക് ശേഷമാണ് യോഗം നിർത്തി വയ്ക്കാൻ സിഐടിയു തയ്യാറായത്. വലിയ പ്രതിഷേധമാണ് ഇതിനെതിരെ ഉയരുന്നത്. സിഐടിയു ജില്ലാ സെക്രട്ടറിക്ക് എതിരെ കേസെടുക്കണമെന്നാവശ്യപ്പെട്ട് കെഎസ്‍യു ജില്ലാ നേതൃത്വം ജില്ലാ കളക്ടർക്ക് പരാതി നൽകിയിട്ടുണ്ട്.

സ്കൂളുകളും കോളേജുകളും അടച്ചിടാനും സർക്കാർ പൊതു പരിപാടികൾ എല്ലാം റദ്ദാക്കാനും സർക്കാർ തീരുമാനിച്ചിരുന്നു.  മതപരമായ ച‍ടങ്ങുകളും കൂട്ടായ്മകളും ഒഴിവാക്കാൻ സർക്കാർ അഭ്യർത്ഥിച്ചിരുന്നതാണ്. ശബരിമല ക്ഷേത്രത്തിൽ തീർത്ഥാടനം നിയന്ത്രിച്ചു. കൊച്ചിൻ ദേവസ്വം ബോർഡിന് കീഴിലുള്ള എല്ലാ ഉത്സവങ്ങളിലെയും ആഘോഷങ്ങൾ റദ്ദാക്കി. സിനിമാശാലകളിൽ പോകരുതെന്നും വിനോദ ശാലകൾ 31വരെ അടച്ചിടണമെന്നും സർക്കാർ നിർദ്ദേശിച്ചിരുന്നു.

ആരോഗ്യവകുപ്പിന്‍റെ നി‍ർദേശങ്ങൾ ലംഘിച്ചാൽ പബ്ലിക് ഹെൽത്ത് ആക്ട് പ്രകാരം കേസെടുക്കുമെന്ന് ഇന്നലെയും നിയമസഭയിൽ ആരോഗ്യമന്ത്രി കെ കെ ശൈലജ വ്യക്തമാക്കിയതാണ്. സർക്കാർ നിർദ്ദേശങ്ങളോടെല്ലാം പൊതുജനം വളരെയധികം സഹകരിച്ച്‌ ഈ മഹാമാരിയെ ഒഴിവാക്കാൻ ശ്രമിച്ചുകൊണ്ടിരിക്കയാണ്. എന്നിട്ടും ഇടത് അനുകൂല സംഘടയായായ സിഐടിയു ന് മാത്രം സർക്കാർ ഉത്തരവ് പുല്ലുവില.