Top Stories
ലോകത്ത് കോവിഡ് ബാധിതരുടെ എണ്ണം 30 ലക്ഷം കടന്നു
കോവിഡ് 19 ബാധിതരുടെ എണ്ണം ലോകമാകെ 30 ലക്ഷം കടന്നു. ഏറ്റവും പുതിയ കണക്കനുസരിച്ച്‌ വൈറസ് ബാധിതരുടെ എണ്ണം 30,62,777 ആയി. 2,11,804 പേരുടെ ജീവനാണ് കോവിഡ് ഇതുവരെ കവർന്നത്.
അമേരിക്കയിലാണ് ഏറ്റവും കൂടുതൽ വൈറസ് ബാധിതർ ഉള്ളത്. പത്ത് ലക്ഷത്തിനടുത്ത് രോഗബാധിതരുള്ള അമേരിക്കയിൽ 56,000 പേർ മരിച്ചു. കഴിഞ്ഞ 24 മണിക്കൂറിനുള്ളിൽ മാത്രം 1347 ജീവൻ നഷ്ടമായി. ഇരുപതിനായിരത്തിലേറേ പേർക്ക് പുതുതായി വൈറസ് സ്ഥിരീകരിച്ചു.
2,29,422 പേർക്ക് രോഗം സ്ഥിരീകരിച്ച സ്പെയ്നിൽ 23,521 പേരാണ് ഇതുവരെ മരിച്ചത്. രണ്ട് ലക്ഷം രോഗബാധിതരുള്ള ഇറ്റലിയിൽ മരണം 26,977 ആയി. ഫ്രാൻസിൽ 23,293 പേരും ബ്രിട്ടണിൽ 21,092 പേരും മരിച്ചു. ജർമനിയിൽ മരണം 6000 കടന്നു. ബെൽജിയത്തിൽ 7200 പേരും ഇറാനിൽ 5800 പേരും ഇതുവരെ മരണപ്പെട്ടു.
യുഎസ് ഒഴികെയുള്ള വൈറസ് ബാധിത രാജ്യങ്ങളിലെല്ലാം മരണസംഖ്യ കുറഞ്ഞുവരുകയാണ്. സ്പെയ്നിലും ഇറ്റലിയിലും ബ്രിട്ടണിലും നാനൂറിൽ താഴെയാണ് കഴിഞ്ഞ ദിവസത്തെ മരണനിരക്ക്. കൊവിഡ് ബാധിതരുടെ എണ്ണവും മരണവും കുറഞ്ഞതോടെ ഓസ്ട്രേലിയ, ന്യൂസിലൻഡ്, സ്പെയിൻ, ഇറാൻ എന്നി രാജ്യങ്ങൾ ലോക്ഡൗണിൽ അയവ് വരുത്തി. ബ്രിട്ടനിൽ തുടർച്ചയായ രണ്ടാം ദിവസവും മരണ സംഖ്യ അഞ്ഞൂറിൽ താഴെയാണ്. രോഗ ബാധിതരുടെ എണ്ണവും കുറയുന്നുണ്ട്.
ലോകത്താകെ കോവിഡ് മുക്തരായവരുടെ എണ്ണം 8,92,599 ആയി. സ്പെയ്നിൽ 1.20 ലക്ഷം പേർ രോഗമുക്തരായി. ജർമനിയിൽ 1.14 ലക്ഷം രോഗികളും യുഎസിൽ 1.11 ലക്ഷം പേരും പൂർണമായും കോവിഡ് മുക്തരായി. 19 ലക്ഷത്തിലേറെ രോഗികൾ നിലവിൽ ചികിത്സയിലുണ്ട്.
