സിഐ സുധീറിനെതിരെ ആരോപണവുമായി മറ്റൊരു യുവതി കൂടി
കൊച്ചി : മൊഫിയ പര്വീണ് ജീവനൊടുക്കിയ സംഭവത്തില് ആരോപണ വിധേയനായ ആലുവ സിഐ സി എല് സുധീറിനെതിരെ ആരോപണങ്ങള് ഉന്നയിച്ച് ഗാര്ഹിക പീഡന പരാതി നല്കിയ മറ്റൊരു യുവതി കൂടി രംഗത്ത്. ഇന്ന് മോഫിയയുടെ പേരാണ് കേട്ടതെങ്കില് നാളെ തന്റെ പേരും കേള്ക്കേണ്ടി വരും എന്ന് പറഞ്ഞാണ് സുധീറിനെതിരെ യുവതി ആരോപണമുന്നയിച്ചത്. ആലുവ സ്റ്റേഷനിലെത്തിയ തന്റെ പരാതി രേഖപ്പെടുത്താന് പോലും അയാള് തയ്യാറായില്ലെന്ന് യുവതി ആരോപിച്ചു.
“ചെറിയ കേസ് അല്ല എന്റേത്. ഏഴ് ദിവസമായിരുന്നു ഞാന് ആശുപത്രിയില് കഴിഞ്ഞത്. ഭര്ത്താവ് എന്റെ കൈയും കാലും തല്ലിയൊടിച്ചു. ദേഹം മുഴുവനും സിഗരറ്റ് കൊണ്ട് പൊളിച്ചു. ഇതോടെയാണ് പരാതിയുമായി പൊലീസിനെ സമീപിച്ചത്. എന്നാല് ഭര്ത്താവും സിഐയും കൂടി എല്ലാം തേച്ചു മായച്ചു കളഞ്ഞു”, യുവതി പറഞ്ഞു.
സുധീറിന് മനസാക്ഷി എന്നൊരു വികാരമില്ലെന്നും പണത്തിന് വേണ്ടി അയാള് എന്തും ചെയ്യുമെന്നും യുവതി പറയുന്നു. തന്നെ മാനസികരോഗിയാക്കി ചിത്രീകരിച്ചെന്നും പരാതി തേച്ചുമായ്ച്ച് കളയാന് 50,000 രൂപയാണ് ഭര്ത്താവില് നിന്ന് സിഐ വാങ്ങിയതെന്നും യുവതി പറഞ്ഞു. പണത്തിന് വേണ്ടി മാത്രമാണ് അയാള് ജീവിക്കുന്നതെന്നും അവര് കൂട്ടിച്ചേര്ത്തു.
അതേസമയം സി എല് സുധീറിനെ സസ്പെന്റ് ചെയ്യണമെന്നാവശ്യപ്പെട്ട് അന്വര് സാദത്ത് എം എല് എയുടെ പ്രതിഷേധം. ആലുവ പോലീസ് സ്റ്റേഷന് മുന്നില് കുത്തിയിരുന്നാണ് എം എല് എയുടെ പ്രതിഷേധിക്കുന്നത്. സി ഐ ഡ്യൂട്ടിക്കായി പോലീസ് സ്റ്റേഷനിലെത്തിയതോടെയാണ് എം എല് എ കുത്തിയിരുപ്പ് സമരം ആരംഭിച്ചത്. സുധീറിനെ സ്റ്റേഷന് ചുമതലകളില് നിന്ന് മാറ്റുന്നതുവരെ സമരം തുടരുമെന്ന് എം എല് എ അറിയിച്ചു.