ടിപി ഓർമ്മയായിട്ട് ഇന്ന് എട്ടു വർഷം

സിപിഎമ്മിന്റെ പല നിലപാടുകളിലും അഭിപ്രായ വ്യത്യാസം ഉണ്ടായിരുന്ന ടിപി ചന്ദ്രശേഖരൻ പാർട്ടിയിൽ നിന്നും വഴിമാറി 2009 ൽ ഒഞ്ചിയം ആസ്ഥാനമാക്കി റവല്യൂഷണറി മാർക്സിസ്റ്റ് പാർട്ടി എന്ന ആർഎംപി ആരംഭിച്ചു. തുടർന്ന് സിപിഎമ്മിന് വലിയതോതിൽ സ്വാധീനമുണ്ടായിരുന്ന ഒഞ്ചിയം പഞ്ചായത്ത് ആർഎംപി പിടിച്ചെടുത്തു. ഇതിനുപിന്നാലെയാണ് ടി പി കൊല്ലപ്പെടുന്നത്.

2012 മെയ് 4 ന് രാത്രി 10 മണിക്ക് വടകരയ്ക്കടുത്തുള്ള വള്ളിക്കാട് വെച്ച് ഒരു സംഘം അക്രമികൾ ബോംബെറിഞ്ഞ ശേഷം ടിപി ചന്ദ്രശേഖരനെ 51വെട്ട് വെട്ടി കൊലപ്പെടുത്തുകയായിരുന്നു. സിപിഎമ്മിന് നേർക്ക് സംശയമുന നീണ്ട ടിപി വധം അക്കാലത്ത് കേരളത്തിലെ ഏറ്റവും വലിയ ചർച്ചാവിഷയമായിരുന്നു.

തുടർന്ന് കുറ്റക്കാരാണെന്ന് കണ്ടെത്തിയ 3 സിപിഎം നേതാക്കൾ ഉൾപ്പെടെ 11 പ്രതികൾക്ക് കോടതി ജീവപര്യന്തം ശിക്ഷ വിധിച്ചു. മറ്റൊരു പ്രതിയെ മൂന്നുവർഷം കഠിനതടവിനും ശിക്ഷിച്ചു. ടിപി ചന്ദ്രശേഖരന്റെ വധത്തിന് കാരണം രാഷ്ട്രീയ വൈരാഗ്യമാണെന്ന് വിധിന്യായത്തിൽ കോടതി നിരീക്ഷിച്ചിരുന്നു.